Aendi Zwängerjahr isch i dr Hornussergsellschaft Oberbottige nah de Spiländi öppe o no gsunge u gjutzet worde. Glychzytig het's o im Riedbach es paar singfreudige Manne gha wo da nid sälte mit ygstimmt hei. D'Ydee e Jodlerklub z'gründe isch so gebore worde.
Am 31. Oktober 1930 het ds Jodlerdoppel-Quartett Oberbottige sy Gründig erläbt. Dr Ortsname "Flüehli" zwüsche Oberbottige u Riedbach het sich o grad guet geignet für e Klubname "Flüehli".
Als Gründerpresidänt het dr Hans Zbinden gamtet, Traugott Baumgartner, Lehrer z'Oberbottige het ds Dirigiere überno.
Flyssig isch güebt worde für ds erschte Konzärt am 20. Juni 1931. I gwöhnlige Hose, Hemmli u Gilet het dä Uftritt stattgfunge. Im Früehlig druf sy Chüejermütze agschaffet worde, di je nach Mügligkeit jede sälber zahlt het. I der Ufmachig sy vermehrt Uswärtsuftritte z'stang cho. Um a Jodlerfescht chönne teil z'näh, isch der Klub 1935 em Eidgenössische Jodlerverband byträte.
D'Kriegsjahr hei wäg Arbeitsplatzverschiebige Wägzüg vo Mitglieder zur Folg gha, o Unstimmigkeite ungerenang hei fasch zum Ungergang gfüehrt. Dank em junge, ehrgyzige Presidänt, Peter Wüthrich, wo neui Sänger mit längerfrischtigem Wohnsitz het chönne ygliedere, esch's wieder obsi gange.
Am Eidg. Jodlerfescht 1936 in Solothurn het sich dr Klub erschtmals la beurteile, wo verschiedeni Mängel sy zum Vorschyn cho, o im folgende Jahr, Kantonale Jodlerfescht in Biel het's trotz Byzug vom ene Experte nid zur Höchschtnote glängt.
I're Periode mit Ushilfsdirigänte u zytwys o ohni Jodler het's, um der Zämehang z'bhalte, Jassabende gä. Wo d'Dirigäntefrag isch glöst gsi, isch dr Chrieg usbroche u die meischte Mitglieder hei zur Gränzbsetzig müesse yrücke. D'Vereinsläbe sy uf e Nullpunkt gsunke. Trotzdäm isch's glunge dr Singbetrieb wieder uf z'näh u sogar Konzärt si abghalte worde.
Nach Chriegsändi sy regelmässig es Früehligskonzärt im Riedbach u es Herbschtkonzärt z'Oberbottige über d'Bühni gange. Dr Bsuech am Kantonale Jodlerfescht 1948 in Herzogenbuchsee isch nid erfolgrich gsy. Hingäge am Eidgenössische 1949 z'Bärn het's unger Mithilf voma bekannte Jodler u Komponischt, Ernst Sommer zum erschte "sehr gut" glängt. Das het Uftrieb gä u ds Sälbschtvertroue gstärkt.
Die folgende Jahr sy näbscht Konzärt u Theater, Teilnahme a Jodlerfescht, Uswärtsuftritte, Jubiläums - u Yweihigsfyre guet usgfüllt gsy.
Zum 25 jährige Jubiläum 1955 hei mir, meh für Uswärtsuftritte, Halblynchleider agschaffet, die jede sälber zahlt het. Im Jahr druf het üs dr damalig bewährti Jodler wieder verla. Mit em Ernst Gasser hei mir e gueti Ushilf gfunge, dä em gly druf yträtende Adolf Herren, wo no hüt e taläntierte Jodler isch, e guete Lehrmeischter isch gsy. 1960 het o dr Klub vom Eidgenössische Verband für 25 Jahr Mitgliedschaft d'Urkunde chönne entgägenäh, glychzytig o die erschte vier Veterane, wo mit sie o d'Ehremitgliedschaft vom Klub erlangt hei. Die Ehrig het o dr Ernst Gasser chönne entgägenäh, zum Dank als Ushilfsjodler, für Berater vo de Sänger u als zueverlässige, vorbildliche Kamerad während 5 Jahr.
Leider isch dr Werner Huber nach 20 jähriger Dirigäntetätigkeit verstorbe. Fritz Spycher isch bereit gsy das Amt z'übernäh. I der Zyt mit ihm hei mir e regi Vereinstätigkeit gha, wie Mitorganisation vom Mittelländische Schwingfescht 1966 z'Oberbottige, Singe im Radio, Konzärt u Theater in Mezières, usw. D's 40 jährige Jubiläum isch am Herbschtkonzärt nur erwähnt worde, hingäge het me dr Peter Wüthrich zum Ehrepresidänt erkore. Grosses Glück het üs beschert mit em Ytritt vom Hans-Ruedi Steiner als Jodler. Sy Begabig u Chönne het üs agspornt u ds Niveau vom Klub isch merklig gstiege.
1973 het d'Chrankheit vom Fritz Spycher wieder e Dirigäntewächsel zur Folg gha. Es Genie als Chorleiter u liebeswürdige Kamerad hei mir im Pascal Oberholzer gfunge. Dr Bsuech bym Trachteverein in Mindelheim (Deutschland), dr Umzugwage "Chäs u Brot" am Jodlerfescht z'Langnau u dr Ytritt vom Ernst Hänni als Jodler sy die Houptereignsi vo där Zyt gsy. Leider het o dr Pascal ds Dirigiere chrankheitshalber müesse ufgä. Mit em Nachfolger, Hansueli Guggisberg hei mir o sehr erfolgrychi Zyt erläbt. Uswärtskonzärt uf eigeni Rächnig hei dr Bekanntheitsgrad erwyteret.
Zum 50 jährige Jubiläum hei mir erschtmals e Tonträger ufgno. Neui Halblynchleider sy agschaffet worde. Das 3 tägige Fescht het z'Niederbottige vor em alte Hochstudhuus im aboute Zält statt gfunge, dass e grosse Erfolg isch gsy.
Mit em Jürg Aeschlimann isch e wytere angehende Jodler i üs'ne Reihe ufgno worde. Mit ihm sy o schöne Erfolge z'verbueche gsy, bsungersch mit de Chlyformatione. Us unerklärleche Gründe isch är 1999 em Klub fern bliebe.
1985 isch der Klub für 50 Jahr Mitgliedschaft im EJV gehrt worde. Glychzytig het sich der Werner Wüthrich als erschte als Ehreveteran chönne la fyre. Zu däm Alass hei mir im Jahr vorhär e zweute Tonträger ufgno. Im folgende Jahr sy d'Stadtpresidänte-Fyr vo üsem Kamerad, Urs Begert u d' Jodlerdorfet z'Niederbottige, dasmal mit Theater, d'Höhepunkte gsy. D'Jodlervereinigung "Stärnebärg" hei 1990 o d'Oberbottiger ghulfe gründe. Nach 1996 tüe mir hür ds Jodlerträffe zum 2. Mal dürefüehre. Zu der Zyt isch Daniel Fuchs zue-n-is gstosse, dä, wie me hüt cha feschtstelle, zum taläntierte Jodler ufgstiege isch. 1992 hei d'Ufnahme für 'ne 3. Tonträger stattgfunge. Gly druf het is Hansueli Guggisberg als Dirigänt verla, 16 Jahr sygi gnue, wie-n-är sälber gseit het. Als Nachfolger hei mir dr Fritz Hänni chönne gwinne. Mit ihm hei mir e guet usgwiesene Chorleiter u'ne liebe Kamerad übercho. Leider het är als Buur mit 4 Dirigäntestelle die Ueberbelaschtig müesse abboue. Mit syne Nachfolger, Jürg Wenger u nachhär Beatrice Lehner sy mir nid so rächt z'Gang cho u dr Erfolg het abgno. Syt 2003 sy mir unger dr Leitig vo'r Therese Aeberhardt. Mit ihre hei mir ds grosse Los zoge. Wüsse, Chönne, Geduld u ds liechte Bybringe mit Humor isch i ihre vereint. Hoffe es blyb no müglescht lang eso.
Ds gäng bessere Usschaffe für konzärtryfi Lieder mit bewährte Dirigänte u begabte Jodler het derzue gfüehrt, dass jährlich nume no 1 Ungerhaltigsabe statt gfunge het, derfür ds glyche Programm mehrmals uswärts, so uf dr Bütschelegg u z'Niederwange. Wo ds grösserwärde vo de Bsuecherzahle 4 Uffüehrige erforderet het, hei mir i d'MZA Oberwange gwächslet, wo inzwische oscho 3 Abe nötig sy.
Zur Beliebtheit vo üs'ne Konzärt füehre sicher o die verschiedene klubeigene Ungerformatione by, äbefalls die Theaterylage mit eigene Lüüt.
Zu üsem 75. Geburtstag im Jahr 2005 hei mir dr 4. Tonträger ufgno. Ds 3-tägige Jubiläumsfescht hei mir i dr Längweid uf em Hof vo üsem Jodlerkamerad Urs Begert erfolgrich chönne düreführe.
Ändlech isch es im Herbscht 2009 sowit gsi. Nach intensive Gschpräch si 5 jungi, talentierti, flotti Bursche zu nis gstosse. Freude herrscht!!!
Im Jahr 2010 hei mir für 75 Jahr Verbandszugöhrigkeit vom BKJV e schöni Wappeschibe dörfe entgäge nä.
Zu mängem unvergässliche, schöne u gmüetlige Alass hei mir üsi Tracht agleit, aber mehrmals hei mir ehemaligi, liebi Kamerade so uf ihrem letschte Wäg begleitet.
A 13 Eidgenössische, 22 Kantonale u 2 Westschwyzerische Jodlerfescht het dr Klub 23 "sehr gut" u 14 "gut" abgschnitte.
Zum Erfolg bruucht's e gsanglechi Disziplin u'ne vorbildlichi Kameradschaft. Das het dür die Jahr by de Bottiger nid gfählt. Viellicht chönnt's o sy, dass trotz im Stadtgebiet vo 33 Mitglieder 20 dervo Buure sy u dass 16 usserhalb dr Gmein Bärn, sogar im Aemmital u im Friberbiet daheime sy.
Adolf Hohermuth und Willy Tröhler